ՓՈՓՈԽՈՒԹՅՈՒՆՆԵՐԸ ԿԱՏԱՐՎԱԾ ԵՆ ՀՈՒԼԻՍԻ 22 2026թ․

Դասընթացին գրանցվելով և վճարում կատարելով՝ մասնակիցը հաստատում է, որ ծանոթացել և համաձայնել է ստորև ներկայացված պայմաններին։

1. Ծառայությունների շրջանակը

Կազմակերպիչը և դասընթացավարները պարտավորվում են տրամադրել դասընթացի ծրագրով նախատեսված ուսումնական նյութերը, ուղիղ եթերները, դրանց տեսաձայնագրությունները և մասնագիտական աջակցությունը։
Դասընթացի տեսաձայնագրությունները մասնակցին հասանելի կլինեն նվազագույնը 6 ամիս և առավելագույնը 1 տարի՝ համաձայն ընտրված փաթեթով կամ պայմանագրով նախատեսված պայմանների։

Մասնագիտական աջակցությունը տրամադրվում է դասընթացի ընթացքում և կարող է շարունակվել մինչև 1 տարի՝ վերջին ուղիղ եթերի անցկացման օրվանից՝ համաձայն կազմակերպչի ստանձնած պայմանագրային պարտավորությունների։

2. Արդյունքների վերաբերյալ սահմանափակում

Կազմակերպիչը և դասընթացավարները չեն երաշխավորում մասնակցի արդյունքները, որոշակի եկամտի ստացումը, վաճառքի ծավալը կամ այլ ֆինանսական արդյունք։

Մասնակցի վերջնական արդյունքը կախված է նրա ներգրավվածությունից, առաջադրանքների կատարումից, գործնական քայլերից, ներդրված ռեսուրսներից, շուկայական պայմաններից և այլ հանգամանքներից։

3. Մասնակցությունը դադարեցնելու և վերահաշվարկի կարգը

Եթե մասնակիցը որոշում է որևէ պատճառով դադարեցնել մասնակցությունը, դասընթացի ընդհանուր արժեքը հավասարապես բաժանվում է ծրագրով նախատեսված մինիմալ քանակի դասերի միջև։

Դադարեցման պահին հաշվարկվում է արդեն փաստացի անցկացված ուղիղ եթերների քանակը և դրանց համապատասխան արժեքը։ Այդ գումարը համարվում է ամբողջությամբ մատուցված ծառայության արժեք և վերադարձման ենթակա չէ։
Հաշվարկի համար նշանակություն չունի՝ մասնակիցը ներկա գտնվել է ուղիղ եթերին, դիտել է տեսաձայնագրությունը, թե ոչ։ Ծառայությունը համարվում է մատուցված տվյալ ուղիղ եթերի անցկացմամբ և համապատասխան նյութերը հասանելի դարձնելով։

Եթե մատուցված ծառայությունների հաշվարկված արժեքը գերազանցում է մասնակցի վճարած գումարը, մասնակիցը պարտավոր է տարբերությունը վճարել ծանուցումն ստանալուց հետո՝ 48 ժամվա ընթացքում։

Եթե վճարված գումարը գերազանցում է մատուցված ծառայությունների արժեքը, տարբերությունը վերադարձվում է մասնակցին՝ կողմերի միջև համաձայնեցված եղանակով և ժամկետում։

4. Դասընթացի մեթոդաբանությունը

Դասընթացն իրականացվում է PBL՝ նախագծային ուսուցման մեթոդաբանությամբ՝ մոտավորապես 10% տեսական և 90% գործնական բաղադրիչով։

Ծրագիրը կառուցված է քայլ առ քայլ տրամաբանությամբ։ Յուրաքանչյուր հանդիպման ընթացքում քննարկվում են տվյալ դասի թեմային վերաբերող հարցերը, իսկ ծրագրով նախատեսված մյուս բաղադրիչները ներկայացվում են համապատասխան դասերի շրջանակում։

5. Ակնկալվող կրթական արդյունքը

Դասընթացի ամբողջական ծրագրին մասնակցելու, նյութերն ուսումնասիրելու և գործնական առաջադրանքները կատարելու դեպքում մասնակիցը կծանոթանա տվյալ ուղղության կազմակերպման հիմնական գործընթացներին և գործիքներին ու կստանա դրանք ինքնուրույն կիրառելու համար անհրաժեշտ գործնական գիտելիքներ։

Կազմակերպիչը երաշխավորում է ծրագրով նախատեսված խորքային և կիրառելի կրթական բովանդակության տրամադրումը՝ սկսնակ մակարդակից մինչև ինքնուրույն աշխատանքի համար անհրաժեշտ մասնագիտական գիտելիքներ։ Այս երաշխիքը չի տարածվում կոնկրետ առևտրային կամ ֆինանսական արդյունքների վրա։

6. Ուսումնական նյութերի օգտագործումը

Տեսաձայնագրությունները, պրեզենտացիաները, ուղեցույցները և մյուս ուսումնական նյութերը նախատեսված են բացառապես գրանցված մասնակցի անձնական օգտագործման համար։

Առանց կազմակերպչի նախնական գրավոր համաձայնության արգելվում է նյութերը պատճենել, տարածել, հրապարակել, վերավաճառել, փոխանցել երրորդ անձանց կամ օգտագործել այլ դասընթացների և առևտրային ծրագրերի շրջանակում։

7. Գաղտնիության քաղաքականություն

Գրանցման և ծառայությունների մատուցման ընթացքում կազմակերպիչը կարող է մշակել մասնակցի տրամադրած անձնական տվյալները, ներառյալ՝ անունը, ազգանունը, հեռախոսահամարը, էլեկտրոնային փոստի հասցեն, վճարման վերաբերյալ տեղեկատվությունը և դասընթացին մասնակցության համար անհրաժեշտ այլ տվյալներ։

Տվյալները մշակվում են հետևյալ նպատակներով՝

• մասնակցի գրանցման և նույնականացման,
• վճարումների հաշվառման,
• ուսումնական հարթակին հասանելիություն տրամադրելու,
• դասերի, նյութերի և կազմակերպչական փոփոխությունների մասին տեղեկացնելու,
• մասնագիտական աջակցություն տրամադրելու,
• կազմակերպչի օրինական և պայմանագրային պարտավորությունները կատարելու համար։

Մասնակցի անձնական տվյալները չեն փոխանցվում երրորդ անձանց, բացառությամբ այն դեպքերի, երբ դա անհրաժեշտ է ծառայության տեխնիկական կամ վճարային սպասարկման համար, պահանջվում է օրենքով կամ իրականացվում է մասնակցի համաձայնությամբ։

Կազմակերպիչը ձեռնարկում է ողջամիտ տեխնիկական և կազմակերպչական միջոցներ՝ անձնական տվյալները չարտոնված հասանելիությունից, կորստից, փոփոխությունից կամ տարածումից պաշտպանելու համար։

8. Պայմանների ընդունումը

Գրանցումը, վճարման կատարումը, դասընթացին միանալը կամ ուսումնական նյութերին հասանելիություն ստանալը համարվում է սույն պայմանների ամբողջական և անվերապահ ընդունում։