ԴԱՍԸՆԹԱՑԻՆ ՄԱՍՆԱԿՑՈՒԹՅԱՆ ՊԱՅՄԱՆՆԵՐ

Ընկերության իրավական անվանում՝ ՏԱՐՈՆ ՊԱՊԻԿՅԱՆ ԱՁ
Ընկերության բրենդային անվանում՝ SSB Academy
Ընկերության ՀՎՀՀ՝ 25339126
Ընկերության գործունեության հասցե՝ Հայաստան, ք․ Երևան, Ազատության 27, Երազ Բիզնես Կենտրոն, 7-րդ հարկ 705 սենյակ
Ընկերության հեռ․ համար՝ +374 15 777 111, +374 95 11 62 11
Ընկերության հիմնական WhatsApp հեռ․ համար՝ +374 43 11 92 11
Ընկերության էլ․ հասցե՝ support@ssbacademy.am

Սույն պայմանների վերջին փոփոխությունը կատարվել է 2026 թվականի սեպտեմբերի 13-ին։

Դասընթացին գրանցվելով, վճարում կատարելով, դասընթացին միանալով և/կամ ուսումնական նյութերին հասանելիություն ստանալով՝ մասնակիցը հաստատում է, որ նախապես ծանոթացել է սույն պայմաններին, հասկացել դրանց բովանդակությունը և համաձայնել դրանց ամբողջությամբ։

1. Ծառայությունների շրջանակը

Կազմակերպիչը և դասընթացավարները պարտավորվում են մասնակցին տրամադրել դասընթացի ծրագրով նախատեսված ուսումնական ծառայությունները, այդ թվում՝ ուսումնական նյութերը, ուղիղ եթերները, դրանց տեսաձայնագրությունները և ծրագրով նախատեսված մասնագիտական աջակցությունը։

Դասընթացի տեսաձայնագրությունները մասնակցին հասանելի են տրամադրվում 6 ամսից մինչև 1 տարի ժամկետով՝ կախված կազմակերպչի կողմից տվյալ դասընթացի բնույթի, բովանդակության, ծրագրային փոփոխությունների, նյութերի արդիականության և ուսումնական անհրաժեշտության գնահատումից։

Տեսաձայնագրությունների հասանելիության կոնկրետ ժամկետը սահմանվում է կազմակերպչի կողմից՝ հաշվի առնելով տվյալ դասընթացի արդյունավետ կազմակերպման և նյութերի արդիական պահպանման անհրաժեշտությունը։

Մասնագիտական աջակցությունը այդ թվում անհատական խորհրդատվությունները, եթե դրանք ներառված են, տրամադրվում է դասընթացի ընթացքում և շարունակվում մինչև 1 տարի՝ դասընթացի վերջին ուղիղ եթերի անցկացման օրվանից՝ կախված ծրագրի բնույթից և կազմակերպչի կողմից գնահատված մասնագիտական աջակցության անհրաժեշտությունից։

2. Արդյունքների վերաբերյալ սահմանափակում

Կազմակերպիչը և դասընթացավարները չեն երաշխավորում մասնակցի կողմից որևէ կոնկրետ ֆինանսական կամ առևտրային արդյունքի ստացումը, այդ թվում՝ որոշակի եկամուտ, շահույթ, վաճառքի ծավալ, հաճախորդների քանակ կամ բիզնեսի այլ չափելի արդյունք։

Մասնակցի վերջնական արդյունքը կախված է բազմաթիվ գործոններից, այդ թվում՝ նրա ներգրավվածությունից, առաջադրանքների կատարումից, գործնական քայլերից, ներդրված ժամանակային և ֆինանսական ռեսուրսներից, ընտրված ռազմավարությունից, շուկայական պայմաններից, երրորդ անձանց գործողություններից և կազմակերպչի վերահսկողությունից դուրս գտնվող այլ հանգամանքներից։

3. Մասնակցության դադարեցման, վերահաշվարկի և գումարի վերադարձման կարգը

3.1. Մինչև 5-րդ դասի ավարտը մասնակցության դադարեցում

Եթե մասնակիցը որևէ պատճառով որոշում է դադարեցնել դասընթացին իր մասնակցությունը մինչև ծրագրով նախատեսված 5-րդ դասի ավարտը, դասընթացի ամբողջ արժեքը վերահաշվարկվում է՝ այն հավասարապես բաժանելով 20 դասերի միջև։

Մեկ դասի հաշվարկային արժեքը որոշվում է դասընթացի ընդհանուր արժեքը 20-ի բաժանելու միջոցով։

Դադարեցման պահին հաշվի է առնվում տվյալ պահի դրությամբ կազմակերպչի կողմից արդեն փաստացի անցկացված ուղիղ եթերների քանակը։

Արդեն անցկացված դասերին համապատասխանող գումարը համարվում է փաստացի մատուցված ծառայության արժեք և վերադարձման ենթակա չէ։

3.2. Ծառայության մատուցված լինելու չափանիշը

Վերահաշվարկ կատարելիս նշանակություն չունի՝ մասնակիցը՝

• մասնակցել է տվյալ ուղիղ եթերին, թե ոչ,
• ամբողջությամբ կամ մասնակիորեն մասնակցել է դասին, թե ոչ,
• դիտել է դասի տեսաձայնագրությունը, թե ոչ,
• օգտվել է տրամադրված ուսումնական նյութերից կամ մասնագիտական աջակցությունից, թե ոչ։

Յուրաքանչյուր դասի մասով ծառայությունը համարվում է մատուցված այն պահից, երբ տվյալ ուղիղ եթերը կազմակերպչի կողմից փաստացի անցկացվել է և տվյալ դասին վերաբերող հասանելիությունը և/կամ նյութերը տրամադրվել են մասնակցին՝ ծրագրով նախատեսված կարգով։

Հետևաբար վերահաշվարկն իրականացվում է բացառապես տվյալ պահի դրությամբ փաստացի անցկացված ուղիղ եթերների քանակի հիման վրա, այլ ոչ թե մասնակցի փաստացի ներկայության կամ նյութերի օգտագործման հիման վրա։

3.3. Վճարված գումարի և մատուցված ծառայությունների արժեքի տարբերությունը

Եթե վերահաշվարկի արդյունքում պարզվում է, որ մասնակցի կողմից վճարված գումարը գերազանցում է մինչև մասնակցության դադարեցման պահը մատուցված ծառայությունների հաշվարկային արժեքը, համապատասխան տարբերությունը վերադարձվում է մասնակցին՝ կողմերի միջև համաձայնեցված եղանակով և ժամկետում։

Եթե արդեն մատուցված ծառայությունների հաշվարկային արժեքը գերազանցում է մասնակցի կողմից փաստացի վճարված գումարը, մասնակիցը պարտավորվում է վճարել առաջացած տարբերությունը կազմակերպչի կողմից համապատասխան ծանուցումն ստանալուց հետո՝ 48 ժամվա ընթացքում։

3.4. 5-րդ դասից հետո գումարի վերադարձման սահմանափակում

Ծրագրով նախատեսված 5-րդ դասի անցկացումից հետո մասնակցի նախաձեռնությամբ դասընթացին մասնակցությունը դադարեցնելու դեպքում մասնակցի կողմից արդեն վճարված գումարը վերադարձման ենթակա չէ։

Սույն պայմանը պայմանավորված է դասընթացի կառուցվածքով և մեթոդաբանությամբ, որի համաձայն առաջին 5 դասերի ընթացքում մասնակցին տրամադրվում է ծրագրի առանցքային և հիմնարար բովանդակությունը, ձևավորվում է հետագա ուսումնական և գործնական գործընթացների համար անհրաժեշտ բազան, ներկայացվում են հիմնական աշխատանքային մեխանիզմները և տրամադրվում են դասընթացի հետագա փուլերն ինքնուրույն ընկալելու և կիրառելու համար անհրաժեշտ հիմքերը։

Հետևաբար 5-րդ դասի անցկացումից հետո մասնակցի կողմից դասընթացից կամավոր հրաժարվելը չի հանդիսանում արդեն վճարված գումարի ամբողջական կամ մասնակի վերադարձի հիմք։

Այս սահմանափակումը կիրառվում է անկախ այն հանգամանքից՝ մասնակիցը փաստացի ներկա է գտնվել առաջին 5 ուղիղ եթերներին, դիտել է դրանց տեսաձայնագրությունները կամ օգտագործել է տրամադրված նյութերը, թե ոչ, պայմանով, որ կազմակերպիչը համապատասխան դասերը փաստացի անցկացրել և ծրագրով նախատեսված հասանելիությունը տրամադրել է մասնակցին։

3.5. Դադարեցման մասին ծանուցումը

Մասնակցության դադարեցման ցանկության դեպքում մասնակիցը պարտավոր է այդ մասին գրավոր տեղեկացնել կազմակերպչին կազմակերպչի կողմից օգտագործվող պաշտոնական հաղորդակցման միջոցներից որևէ մեկով։

Վերահաշվարկի համար հիմք է ընդունվում մասնակցի կողմից դադարեցման վերաբերյալ գրավոր ծանուցումն ստանալու պահը։

Մինչև այդ պահը փաստացի անցկացված բոլոր ուղիղ եթերները ներառվում են մատուցված ծառայությունների հաշվարկում։

4. Դասընթացի մեթոդաբանությունը

Դասընթացն իրականացվում է PBL՝ նախագծային ուսուցման մեթոդաբանությամբ և ունի հիմնականում գործնական ուղղվածություն՝ մոտավորապես 10% տեսական և 90% գործնական բաղադրիչով։

Ծրագիրը կառուցված է հաջորդական և փոխկապակցված փուլերով։

Յուրաքանչյուր հանդիպման ընթացքում քննարկվում են տվյալ դասի ծրագրով նախատեսված թեմաները, իսկ ծրագրի մյուս բաղադրիչները ներկայացվում և ուսումնասիրվում են համապատասխան դասերի և փուլերի շրջանակում։

Դասընթացի առանձին թեմաների, գործիքների կամ գործընթացների՝ նախորդ դասերի ընթացքում չքննարկված լինելը չի նշանակում, որ դրանք դուրս են ծրագրից, եթե դրանց ուսումնասիրությունը նախատեսված է ծրագրի հետագա դասերում։

5. Ակնկալվող կրթական արդյունքը

Դասընթացի ամբողջական ծրագրին մասնակցելու, ուսումնական նյութերն ուսումնասիրելու և նախատեսված գործնական աշխատանքները կատարելու դեպքում մասնակիցը հնարավորություն է ստանում ծանոթանալու տվյալ ուղղության կազմակերպման հիմնական գործընթացներին, գործիքներին և կիրառման մեխանիզմներին և ձեռք բերելու ինքնուրույն աշխատանքի համար անհրաժեշտ գործնական գիտելիքներ։

Կազմակերպիչը պարտավորվում է ապահովել ծրագրով նախատեսված խորքային, կիրառելի և կառուցվածքային կրթական բովանդակության տրամադրումը՝ սկսնակ մակարդակից մինչև ինքնուրույն աշխատանքի համար անհրաժեշտ մասնագիտական գիտելիքների և գործիքների ներկայացում։

Սույն պարտավորությունը վերաբերում է կրթական ծառայության և ծրագրով նախատեսված բովանդակության տրամադրմանը և չի հանդիսանում մասնակցի կողմից որոշակի վաճառքի, եկամտի, շահույթի կամ այլ առևտրային արդյունքի ստացման երաշխիք։

6. Ուսումնական նյութերի օգտագործումը

Դասընթացի շրջանակում մասնակցին հասանելի դարձված տեսաձայնագրությունները, պրեզենտացիաները, մեթոդական նյութերը, ուղեցույցները, ֆայլերը, ձևանմուշները և այլ ուսումնական նյութերը նախատեսված են բացառապես գրանցված մասնակցի անձնական օգտագործման համար։

Առանց կազմակերպչի նախնական գրավոր համաձայնության արգելվում է ամբողջությամբ կամ մասնակիորեն՝

• պատճենել կամ վերարտադրել ուսումնական նյութերը,
• հրապարակել կամ տարածել դրանք,
• փոխանցել երրորդ անձանց,
• վաճառել կամ վերավաճառել դրանք,
• տրամադրել դրանց հասանելիությունը այլ անձանց,
• օգտագործել դրանք այլ դասընթացների, խորհրդատվական ծառայությունների կամ առևտրային ծրագրերի շրջանակում։

Մասնակցի կողմից սույն պահանջների խախտման դեպքում կազմակերպիչն իրավունք ունի ձեռնարկել իր իրավունքների և օրինական շահերի պաշտպանության համար օրենքով թույլատրելի միջոցներ։

7. Գաղտնիության քաղաքականություն և անձնական տվյալներ

Գրանցման և ծառայությունների մատուցման ընթացքում կազմակերպիչը կարող է հավաքել և մշակել մասնակցի կողմից տրամադրված անձնական տվյալները, այդ թվում՝ անունը, ազգանունը, հեռախոսահամարը, էլեկտրոնային փոստի հասցեն, վճարումների վերաբերյալ տեղեկատվությունը և դասընթացին մասնակցության կազմակերպման համար անհրաժեշտ այլ տվյալներ։

Տվյալները կարող են մշակվել հետևյալ նպատակներով՝

• մասնակցի գրանցման և նույնականացման,
• վճարումների հաշվառման,
• ուսումնական հարթակին և նյութերին հասանելիություն տրամադրելու,
• դասերի, նյութերի և կազմակերպչական փոփոխությունների վերաբերյալ տեղեկացնելու,
• մասնագիտական աջակցություն տրամադրելու,
• կազմակերպչի պայմանագրային և օրենքով նախատեսված պարտավորությունները կատարելու նպատակով։

Մասնակցի անձնական տվյալները երրորդ անձանց չեն տրամադրվում, բացառությամբ այն դեպքերի, երբ այդպիսի փոխանցումն անհրաժեշտ է ծառայության տեխնիկական, վճարային կամ այլ սպասարկման կազմակերպման համար, նախատեսված կամ պահանջվում է կիրառելի օրենսդրությամբ կամ կատարվում է մասնակցի համաձայնությամբ։

Կազմակերպիչը ձեռնարկում է ողջամիտ տեխնիկական և կազմակերպչական միջոցներ՝ անձնական տվյալները չարտոնված հասանելիությունից, օգտագործումից, փոփոխությունից, կորստից կամ տարածումից պաշտպանելու նպատակով։

8. Պայմանների ընդունումը

Մասնակցի կողմից՝

• դասընթացին գրանցվելը,
• ամբողջական կամ մասնակի վճարում կատարելը,
• դասընթացի որևէ ուղիղ եթերի միանալը,
• ուսումնական հարթակ կամ նյութեր մուտք ստանալը

համարվում է սույն պայմաններին ծանոթանալու և դրանք ամբողջությամբ ընդունելու հաստատում։

Մասնակիցը հաստատում է, որ մինչև վճարումը և/կամ ծառայությունից օգտվելը հնարավորություն է ունեցել ծանոթանալու սույն պայմաններին և հասկացել է դրանցում սահմանված՝ ծառայությունների մատուցման, մասնակցության դադարեցման, վերահաշվարկի և գումարի վերադարձման կարգը։

Սույն պայմանների խմբագրված տարբերակն ուժի մեջ է 2026 թվականի սեպտեմբերի 13-ից։