Դուք կարող եք երկար աշխատել լսարանի հետ ջերմ կապեր հաստատելու վրա, սակայն վերջնական վաճառքի համար պարզապես պարտադիր է գրել աշխատող վաճառող տեքստ։ Հենց այստեղ էլ սկսում են շատերի բարդությունները, քանի որ մեզ հանդիպած վաճառող տեքստերի մեծ մասը չոր ու ցամաք ինֆորմացիա է պարունակում, ինչը կարող է վաճառել միայն այն դեպքում, երբ պոտենցիալ գնորդն արդեն կայացրել է որոշումը, այլ կերպ ասած այդպիսի տեքստերը կրում են առավել ինֆորմացիոն բնույթ:

Իսկ ինչպե՞ս գնման դրդել դեռևս չկողմնորոշված լսարանին։

Մասնագետներն առանձնացնում են վաճառող տեքստերի մի քանի փորձված և արդյունավետ բանաձև, բայց դրանք բոլորն ունեն մեկ կարևոր ընդհանրություն, որն էլ վաճառող պոստերի գլխավոր գաղտնիքն է՝ անհրաժեշտ է խոսել մարդկանց ցավերի մասին և այդ ցավերին լուծում առաջարկել, այլ կերպ ասած՝ կարևորվում է թիրախային լսարանի առաջնահերթությունների մասին խոսելը և դրա վրա ֆիքսվելը:

Հետևաբար՝ դուք պետք է լավ ճանաչեք ձեր լսարանը և նրանց ցավերը, որպեսզի կարողանաք նրանց որևէ բան վաճառել, իսկ դա իրապես պահանջում է որոշակի ժամանակ, աշխատանք և թեսթավորումներ թիրախային լսարանի շրջանակում:

Կարծում ենք՝ արդեն պետք է որ կազմած լինեք ձեր լսարանների դիմանկարները՝ իրենց ցավերով/առաջնահերթություններով, այնպես որ կարող ենք անցնել բանաձևերին:

AIDA

Attention (ուշադրություն), Interest (հետաքրքրություն), Desire (ցանկություն), Action (գործողություն)

Այլ խոսքերով՝ նախ գրավում ենք ուշադրությունը (հենց այստեղ էլ շեշտը դնում ենք ցավոտ կետի վրա), այնուհետև հիմնավորումներ տալիս, որոնք կշահագրգռեն պոտենցիալ հաճախորդին, որից հետո անում առաջարկ, որը ընթերցողի մոտ գնում կատարելու ցանկություն կառաջացնի, և վերջում հստակ call to action սահմանում։

Օրինակ՝

Կրկին չեք հասցնում Ամանորի նվերներ գնել, ու տանջվում եք մեղքի զգացումի՞ց։ Շատերին է ծանոթ այդ զգացումը։

Ժամանակակից կյանքի տեմպը թույլ չի տալիս մտերիմներին այնքան ժամանակ հատկացնել, որքան որ կուզենայինք։ Այժմ հնարավորություն կա ընդամենը մեկ կայք այցելելով ընտրել նվերներ ամբողջ ընտանիքի համար՝ վստահ լինելով, որ բոլոր նվերները գեղեցիկ փաթեթավորված և ճիշտ ժամանակին կլինեն ձեզ մոտ։

Ի դեպ՝ 3 և ավելի նվեր պատվիրելու դեպքում մենք էլ ձեզ անակնկալ կմատուցենք :)

Այցելեք www.*******.am և ընտրեք, թե ինչով եք ուրախացնելու ձեր մտերիմներին։


PAS/ PmPHS

Problem - Attention - Solution

կամ

Pain - more Pain - Hope - Solution

Ներկայացնում ենք խնդիրը, գրավում ուշադրություն, առաջարկում լուծում, կամ էլ ցավի կետի վրա սեղմում , ավելի սեղմում, հույս տալիս, որ լուծում կա, առաջարկում լուծումը։

Օրինակ՝

Թերթում ես Ինստագրամը, հիանում մոդելների գեղեցիկ մարգարտագույն մազերով և տխրում, որ այդպիսի գույն երբեք չես ունենա։

Վերջին անգամ, երբ փորձեցիր, վարսահարդարը վառեց մազերիդ մեծ մասը, և արդյունքում գեղեցիկ բաց գույնի փոխարեն ստացավ ինչ-որ տգեղ ժանգի գույն։

Բայց հուսահատվել պետք չէ․ բավական է նայել մեր էջում ներկայացված աշխատանքները, որպեսզի հասկանաք, որ ցանկացած գույնի մազերի վրա կարող ենք ստանալ ձեր երազած երանգը։

Դե ի՞նչ, փորձե՞նք։

4 P

Picture - Promise - Prove - Push

Նկարագրեք (դա ամենալավ ձևերից է գայթակղեկու), խոստացեք, ապացուցեք և դրդեք գնման։

Օրինակ՝

Պատկերացրեք՝ գեղեցիկ տեսարանով պատշգամբ, որտեղ կատարյալ լռություն է՝ չհաշված անտառի ձայները, դուք վայելում եք ձեր սուրճը և ոչ մի տեղ չեք շտապում։

Կարծում եք՝ նման բան հնարավո՞ր չեք։ Վստահեցնում ենք, որ սխալվում եք։ Ձեզնից՝ երկօրյա արձակուրդ կազմակերպելը, մեզնից՝ վերևում նկարագրված աստվածային հանգիստը ***** հյուրանոցում։

Մեր հյուրերի արձագանքներին կարող եք ծանոթանալ սթորիների reviews բաժնում։

Ամրագրեք այսօր, քանի որ պատշգամբով սենյակներն ընդամենը 3-ն են ))

3 ԱՅՈ-ների բանաձևը

Մարքեթոլոգները համոզված են, որ եթե մարդը ձեզ հետ զրուցելիս երեք անգամ ասի այո, ապա չորրորդ հարցին նույնպես մեծ հավանականությամբ կասի այո։ Փորձենք օգտագործել այս հնարքը վաճառող պոստ գրելիս։
Օրինակ՝

Ամանորի ամենասպասված պահը ընտանիքի հետ սեղան նստելն է, այնպես չէ՞։ Սակայն որքան բան է պետք անել մինչև այդ երանելի պահը՝ գնումներ կատարել, ողջ օրն անցկացնել խոհանոցում, այնուհետև սեղան գցել․․․
Ինչ լավ կլիներ, չէ՞, եթե այդ ամենը ինչ-որ հրաշքով անեին ձեր փոխարեն։

Ինչու՞ չպատվիրել այդ հրաշքը մեզ մոտ։ Կապվեք մեզ հետ, և Ամանորին ձեզ կմնա միայն ընտրել տոնական զգեստը։

FAQ բանաձև՝ պատասխաններ հաճախակի տրվող հարցերին

Առարկություններին նախապես արձագանքելը վաճառքի ամենաարդյունավետ տակտիկաներից է։ Այստեղ չկա ստանդարտ բանաձև, հաճախակի տրվող հարցերը կամ առարկությունները կախված են կոնկրետ պրոդուկտից կամ ծառայությունից։

Օրինակ՝

Ինչու՞ պիտի ընտրեմ ձեզ
Ի՞նչ կտա ինձ ձեր պրոդուկտը
Իսկ թանկ չէ՞
Ո՞րն է առավելությունը
Ի՞նչ ապացույցներ ունեք, որ արժե գնել

Յուրաքանչյուր բիզնես գիտի, թե որ հարցերն են ամենից շատ հուզում լսարանին, իսկ եթե չգիտեք՝ օգտագործեք հարցուպատասխանի հնարավորությունը: